SPORTING 0-CELTA 1

O Celta rematou coa imbatibilidade do Sporting grazas a un bo gol de Okkas, e sobre todo a un encontro no que o noso equipo seguíu amosando certa melloría, e onde xa se vai ollando a un Celta cada vez máis sólido, sobre todo no aspecto defensivo, onde a entrada de Lequi (e onte tamén a de Contreras) no once titular semella que ten moito que ver nelo.

Con este triunfo, ademais doutros resultados dados nesta mesma xornada, o Celta segue recortando puntos cos postos de cabeza, e agora mesmo o ascenso sitúase seis puntos por enriba nosa. A xeira de enfrontamentos cos equipos da zona alta da clasificación prosegue o vindeiro domingo en Balaídos co Rácing de Ferrol como rival, nun encontro que dará comezo, en principio, ás seis da tarde. Un novo triunfo sería primordial para ratificar esta melloría, e situar ó noso equipo ben posicionado na longa carreira polo ascenso.

Pola nosa banda, boa presencia no Molinón, movilizando a unhas 140 persoas entre os dous autobuses alugados e os que nos acompañaron en coches, e que tamén se subirón ós autocares para entrar no estadio xixonés. A crónica e fotos da nosa viaxe, no vindeiro número de Dende as Bancadas.

Iso sí, salientar que pese a non ser unha viaxe anunciada e estarmos xa pola zona a iso das 9 da mañá, a policía tiña un dispositivo preparado para SECUESTRARNOS e levarnos por e cando quixeron para o campo, e sempre baixo a súa vixianza e desagradable compaña.

E para rematar, tamén queremos enviar dende eiquí un saúdo moi forte para os colegas de fóra que nos acompañaron nesta viaxe.

MÁIS LUME

Novo bombazo no seo do Celta. No día de onte, o director xeral do noso equipo, Xavier Martínez Cobas, anunciaba a súa marcha do clube, inda que ésta non se fará efectiva ata que se atope e anuncie o seu sustituto, que non sabemos por canto tempo pode ser. Esta marcha é un auténtico sorpresón e mazazo para o celtismo, pois semellaba ser unha persoa de peso dentro da actual estrutura céltica, e cabeza visible do clube. Se xa había poucos problemas e enfrontamentos entre partidarios e detractores do actual consello de administración, que xa ven de lonxe e que mesmo se avivara máis tralo caso Stoichkov, esta nova marcha botará, sen lugar a dúbidas, máis lume á xa de por sí tensa situación actual no entorno céltico. Agora, a prensa sensacionalista viguesa xa ten máis carnaza para emporcar inda máis todo o que actualmente ten que ver co Celta, e onde os intereses e enfrontamentos persoais dalgúns semellan estar moi por enriba de calquera sentimento cara o Celta.

Agardemos que os bos resultados regresen canto antes, e que unha mellora no aspecto deportivo axude a que a situación extradeportiva se calme, porque se non, mal imos entón.

CELTA 2-NUMANCIA 2

O encontro ante o Numancia non distou moito dos xogados anteriormente polo noso equipo na presente campaña. O Celta tivo intres de bo xogo e apuntou cousas positivas, pero unha vez máis non houbo continuidade nese xogo durante todo o encontro, e de novo deixamos que nos empataran (desta volta, ata en dúas ocasións) tras adiantarnos no marcador. Os nosos xogadores teñen que mellora-la concentración durante os partidos e aprender a mante-las ventaxes no marcador, porque a cabeza da liga vai distanciandose paseniñamente, e cada vez vai quedando menos tempo para reaccionar. E o peor de todo é que o vindeiro encontro lévanos á cancha dun dos equipos máis en forma da categoría, o Sporting de Xixón, único equipo de primeira e segunda división que non coñece a derrota ata o dagora. Un triunfo no Molinón daría moita moral ó plantel, mentres que unha derrota ou mesmo un empate non farían outra cousa que deixar ó equipo en terra de ninguén, e moi alonxados das tres plazas de acceso a primeira división. Agora mesmo o ascenso sitúase a oito puntos do Celta.

O peor do vindeiro encontro é que éste voltará a ser televisado en directo polo Canal + ás 12 do mediodía, horario que ata o dagora non se nos deu nada ben, cun saldo de dous empates na casa ante Córdoba e Numancia despois de ir por diante no marcador, e unha derrota en Elxe tras arrollar ó equipo local ata o seu primeiro tanto.

Outras cousas negativas que nos deixou o encontro ante os sorianos foron a rigurosa expulsión de Rubén e a lesión de Canobbio, quen se mancou despois de tropezarse co árbitro ó mesmo tempo que Lequi asinaba coa súa testa o primeiro gol do partido. Salientar tamén que o adestrador López Caro estreouse en Balaídos cunha expulsión.

VIDEO CELTA-XETAFE

Na sección de videos podedes atopar unha ligazón a un vídeo grabado dende Marcador no Celta-Xetafe da pasada tempada, e no que se recollen imáxenes de Marcador e Fondo. Dura 13 minutos e non ten unha grande calidade, pero sí imáxenes interesantes da nosa bancada.

MÁIS SECCIÓNS

Se días atrás falabamos da creación da sección Kalaikoi, hoxe podemos informarvos doutra nova sección de recente aparición, e que ten por nome ANTIFADA. Son xente con menos anos na nosa peña, pero que chegan con gañas de currar a tope e meter moita caña. Benvidos, e que non decaiga.

O CELTA-NUMANCIA, A 5 EUROS

Esta nova vai para @s que todavía non sodes socios do Celta. Inda que o prezo para a bancada de Fondo manterase en 12 euros para o importante choque deste domingo ante o segundo clasificado, cada socio poderá sacar unha entrada por 5 euros para presenciar dito encontro.

EXPOSICIÓN EN VIGO

A mostra Nazón de Breogán, que se poderá visitar na Casa das Artes ata o 11 de novembro, achega ao espectador aos episodios máis relevantes da nosa historia.

Nazón de Breogán

Nazón de Breogán fai un percorrido pola historia do país ata o ano 1936 dun xeito lúdico e visual. A través dos seus paneis, a mostra propón un xeito de soñar Galiza. A exposición achega ademais ao espectador a unha realidade histórica moitas veces descoñecida, marcada pola cultura castrexa, o Reino de Galiza, ou personaxes coma Prisciliano, Xelmírez, Murguía ou Antón Vilar Ponte, que forman parte da nosa historia e da nosa realidade como pobo.Trátase pois, dun xeito entretido de aprender, grazas ao seu formato vivo e moderno, sen renunciar ao seu carácter pedagóxico.

Conmemora ademais o 70 aniversario da celebración do Plebiscito do Estatuto de 1936, un referendo que contou coa participación do 75 por cento do censo e no que se aprobou un texto resultado do esforzo de xentes coma Castelao, Bóveda e outros moitos que traballaron polo autogoberno do país, pero que nunca viron cumprido o seu soño. Un mes despois de terse celebrado o plebiscito, o proceso de autonomía veuse interrompido polo alzamento militar contra a II República.

A mostra comezou a súa andaina en xuño do ano pasado en Santiago, coincidindo co 70 aniversario do plebiscito do Estatuto de 1936. Nazón de Breogán está a ter unha grande afluencia de público – case 20.000 persoas visitárona na súa primeira apertura ao público en Santiago – polo que se organizou un programa itinerante polas diferentes cidades do país. Esta mostra pasou xa polas cidades de Coruña, Ourense, Carballo Pontevedra.e Lugo. En total recibiu preto de 60.000 visitas. O éxito deste mostra débese, segundo sinalou o vicepresidente, a que conta dun xeito sinxelo, "de onde ven este pobo e por que somos o que somos na actualidade".

FOLGA NA CONSTRUCCIÓN

Este luns 15 de outubro tiñan lugar asembleas ás oito da tarde nos locais comarcais da CIG para debater e dar a coñecer o Preacordo para un novo Convenio provincial da Construción en Pontevedra, asinado na madrugada do 11 de outubro, para desconvocar a folga que afecta aos 45.000 traballadores do sector desde o pasado 2 de outubro, ao conseguir un “Convenio histórico” para este sector, conquerindo moitas das súas demandas.

O Preacordo foi ratificado por ampla maioría (e mesmo por asentimento nalgunhas) nas asembleas de traballadores que se desenvolveron desde as 20:00 horas nos locais da CIG (Vigo, O Porriño, A Guarda, Cangas, Pontevedra, Vilagarcía e A Estrada).

Con estas asembleas os traballadores apoiaron o resultado das negociacións, que tiveron como froito unha suba salarial lineal do 5 por cento para todas as categorías, á que hai que sumar un complemento de 4 euros no caso dos axudantes, 8 euros para os oficiais de segunda, e 12 euros para os oficiais de primeira. Ademais, estableceuse unha cláusula de revisión salarial, que é independente dos complementos, no caso de que o IPC supere o 2,7 por cento en 2007, o tope é do 2,6 por cento en 2008, e do 2,5 por cento no último ano de vixencia do Convenio.

Un peón deste sector cobra actualmente na provincia de Pontevedra 13.365 euros brutos e, con ese acordo pasará a cobrar 13.900 en 2007, 14.644 euros en 2008, e 15.330 euros en 2009.

Outras das melloras conquistadas teñe que ver coas dietas, os ascensos, permisos e licenzas ou a xubilación. Con respecto á porcentaxe de traballadores fixos nos persoais, deberá ser de 25 por cento en 2008 e do 35 por cento en 2009.

Por outra banda, fixouse un complemento de incapacidade temporal de ata o cento por cento da base de cotización en caso de enfermidade común desde o primeiro día e até os 90 días, e tamén en caso de hospitalización ou intervención cirúrxica.

ALBACETE 1-CELTA 1

A pesares de ter disputado unha boa primeira parte e de terse adiantado no marcador, o Celta non pasou do empate ante o pechacancelas da clasificación. Unha vez máis, o Celta tirou pola borda o traballo que lle permitira adiantarse no marcador cun golazo de Jorge Larena, e ó igual que acontecera en Castellón ou Elxe con anterioridade, o equipo non foi quen de reporse ó mazazo que supuso o tanto rival, todavía con moitos minutos por diante para poder arranxa-la situación, pero este equipo semella non ter capacidade de reacción algunha cando os rivais son capaces de perfora-la nosa portería. Como non podía ser doutro modo, o gol do Albacete chegou nun novo erro en cadea por parte dunha defensa que en ocasións semella de chiste. E menos mal que quedou aí a cousa, porque desta volta o colexiado axudounos coa anulación dun gol legal por parte do Albacete, e que tería completado a remontada por parte do equipo manchego. De oito encontros ligueiros disputados, en tres ocasións comezamos gañando pero non soubemos manter esa ventaxe, pasando de nove puntos posibles a únicamente dous reais. E lembremos que no encontro de copa ante o Málaga, o equipo tamén rematou por perder por 2-1 un partido que comezara gañando.

Ollando a imaxe dada polo Celta ante os equipos da parte baixa da clasificación, case que nos alegramos de que a partires do vindeiro domingo comecen a enfrontarse ó noso equipo os conxuntos da parte alta, comezando polo Numancia e seguindo por Sporting, Rácing ou Erreala. López Caro ten moito traballo por diante, sobre todo no aspecto defensivo e pcicolóxico, xa que non é lóxico que estes xogadores se desmoronen do feito en que o fan nada máis recibir un tanto en contra. Ademais, unha mellora en canto a resultados pasa por amosar unha concentración máxima durante os 90 minutos de encontro.

Tal como nos preguntabamos antes deste choque, Lequi, Roberto Lago, Quincy e Perera estiveron presentes no once inicial.

DE NOVO POLO CANAL +

A vindeira semana toca madrugar de novo para ollar ó Celta. A chegada do Numancia, un dos gallitos da categoría ata estes intres, fixo que o Canal + elexira este encontro para a súa cita habitual dos domingos. Mentres esta canle trouxolle moi boa sorte ós sorianos, que venceron en Alacante e Ferrol polo mesmo resultado de 1-3 e con importantes favores arbitrais, o Celta conta os seus partidos polo Plus cun triste empate a uns co Córdoba en Balaídos, e unha derrota en Elxe por 2-0. O vindeiro domingo debemos troca-la racha.

ADESTRADOR NOVO...

...¿vitoria segura?. Iso agardamos. Esta tarde, a partires das 18:00 horas estrearase López Caro como novo adestrador do noso equipo. A súa chegada supón o regreso de Lequi a unha convocatoria tras varios meses de ostracismo, mentres que Perera (¿seguirá sendo Perea na súa camisola?) entra por segunda semana consecutiva na lista de convocados. Mesmo non sería extrano ollar a algún deles, ou mesmo ós dous, como titulares na cancha do Albacete. Outro que volta á convocatoria é o brasileiro Roberto Sousa, quen pasou da titularidade a non contar últimamente para Stoichkov. Sorprende tamén a ausencia do búlgaro Zanev, o que facilitaría a presencia do canteirán Roberto Lago na banda esquerda da defensa céltica. ¿Recuperará Quincy a titularidade?. O dito, as respostas terémolas esta mesma tarde. FORZA CELTA.

12 OUTUBRO, NADA QUE CELEBRAR

FOLGA NA CONSTRUCCIÓN

CIG-Comunicación

A quinta xornada de folga na Construción de Pontevedra obtivo de novo o apoio masivo dos traballadores, que acudiron ás marchas polo centro de Vigo, así como continuaron paradas as obras da provincia. Paralelamente, continúan as negociacións, nas que os temas máis importantes como xornada, tempo de desprazamento e melloras salariais están pendentes.

Os sindicatos e a patronal reuníronse de novo na Delegación de Traballo o pasado mércores, e aínda que se achegaron posturas en oito dos dez puntos que compoñen a listaxe das demandas dos traballadores, as diferenzas ao redor do incremento salarial e a adaptación das categorías á realidade do sector, e a actitude “intransixente” da patronal fixeron imposíbel un acordo.

Os aspectos máis importantes da negociación

Así, na cuestión da suba salarial a proposta sindical é dun incremento mensual de 5% no salario base para todas as categorías, e que exista un complemento segundo o posto de traballo que desenvolvas que signifique unha suba de 5 euros mensuais para os axudantes, de 10 euros para os oficiais de segunda, de 15 euros para os oficiais de primeira e de 20 euros para os capataces. A “contraoferta” da patronal é moi baixa e existe unha gran diferenza entre ambas as dúas, xa que é entre 2,5 e até 5 puntos inferior ao que demandan os sindicatos, segundo a categoría.

Outro dos temas aínda por concretar é o tempo de desprazamento, que no actual convenio fixa que unha hora de traslado até o centro de traballo de ida e unha hora de volta corre a conta do traballador, e a proposta sindical é reducir este tempo a media hora, ao que a patronal reaxiu moi negativamente. Por último, outra cuestión pendente é a xornada reducida, que a patronal se nega a que apareza como tal recollida no convenio.

A negociación reabrirase este xoves a partir das 18:00 horas no edificio administrativo de la Xunta, na Delegación de Traballo.

Asemblea ao comezo da concentración

Desde as once da mañá comezaban a chegar os piquetes e folguistas á Porta do Sol, que de novo se encontraban cun paro masivo en toda a provincia nesta quinta xornada.

Na asemblea, que se realizou antes de comezar unha nova marcha polas principais rúas do centro de Vigo, o secretario nacional da Federación da Construción da CIG, Xosé Xoán Melón, trasladou aos folguistas o seu “pesimismo” na posíbel resolución do conflito e explicou que, despois das once horas de negociación coa patronal que se alongaron até ás catro da mañá da pasada madrugada, a oferta de incremento salarial exposta polos empresarios supuxo mesmo unha “agresión”.

Melón subliñou que “esta patronal ten ordes de arriba de non deixar que este conflito se resolva porque non queren que sexamos exemplo para outros sectores e que esta conflitividade se traslade, por exemplo, ás outras provincias”. Sobre a negociación Melón engadiu que “nós xa cedemos todo o que podiamos ceder, e agora tócalle á patronal asumir cal é a vontade dos traballadores e a realidade do sector, porque temos que parar con estes 18 anos de parálise do sector”.

Así mesmo, fixo un chamamento para o 16 de outubro, data desde a que será indefinida esta folga, e “na que temos que ser máis, máis organizados e con máis firmeza, porque é fundamental para presionar nas negociacións”.

Manifestación “escoltada”

Despois de media hora de concentración na Porta do Sol, máis de mil cincocentos obreiros da Construción percorreron distintas rúas do centro da cidade, cortando o tráfico ao seu camiño por Elduayen, Pi y Margall, Tomás Alonso, A Coruña e Praza de América. Nesta praza os manifestantes paralizaron o tráfico na superficie e nos túneles media hora máis e, a seguir, foron cara a Praza España pola Gran Vía.

En todo momento estiveron seguidos por máis de dez furgóns policiais, así como membros do corpo policial de antidisturbios diante e nos laterais, ao que os traballadores responderon con berros de “somos traballadores, non delincuentes”.

Na Praza España continuaron a cortar o tránsito e pasadas as 13:30 horas desconvocouse esta marcha.

Acusacións da patronal

O presidente da patronal da Construción realizaba estes días declaracións aos medios de comunicación nos que cualificaba o conflito da Construción como “irracional e falto de motivos”.

Ademais, Ángel Fernández Presas, presidentes da APEC (patronal da Construción), apuntaba á CIG como a culpábel da situación actual xa que “os anos anteriores asinábamos con CCOO e UGT o convenio en Pontevedra, e agora que a CIG é maioritaria levounos onde estamos”.

FOLGA NA CONSTRUCCIÓN

CIG-Comunicación

Unha nova xornada de folga comezou no sector da Construción da provincia de Pontevedra este martes 9 de outubro, con novas mobilizacións e negociacións desde o luns 8 á tarde, e na que se chegaron a acordos nos temas máis sinxelos como os permisos, a duración do convenio ou a xubilación parcial.

Os máis de 45.000 traballadores do sector da Construción de Pontevedra volvían estar chamados á folga este martes 9 de outubro, no que se volveu a dar un apoio e seguimento masivo a este paro polo Convenio provincial.

Desde as sete da mañá os piquetes volvían percorrer os distintos centros de traballo, nos que podían comprobar o apoio moi maioritario dos traballadores a esta convocatoria.

Primeira xornada de negociación

Esta nova xornada de folga dábase despois dunha primeira “toma de contacto” nas negociacións na tarde do luns 8 de outubro, na que desde as cinco da tarde e até as once e media da noite patronal e sindicatos chegaron a acordos puntuais en cuestións como a vixencia do convenio por tres anos, os permisos ou a xubilación parcial, logo de cinco horas de negociación, nas que non se trataron cuestións económicas e nunha reunión na que estivo presente o delegado provincial de Traballo, Pedro Borrajo, a directora xeral de Relacións Laborais, Pilar Cancela, e o xefe da Inspección, José María Casas.

Entre os aspectos que quedan por abordar está o incremento salarial, a redución da xornada anual en dúas horas ou a implantación da xornada continua no verán, ademais do abono do tempo de desprazamento, o aumento das dietas e os complementos.

Ademais, a patronal aceitou que se produza un ascenso automático de peón a axudante ao cabo de tres anos, aínda que coa condición de que o traballador realice un curso de formación e outro de saúde laboral.

Manifestación e catro detidos

As doce da mañá comezaban a chegar os traballadores até a Porta do Sol, punto de encontro nestas xornadas de folga e desde o que se da saída ás marchas polas principais rúas do centro de Vigo.

Nesta ocasión realizouse ao comezo desta concentración a asemblea de traballadores, na que se informou do desenvolvemento das negociacións e na que Xosé Xoán Melón, secretario nacional da Federación da Construción da CIG, subliñou “que non queremos crear falsas expectativas, porque só tratamos os temas de menor dificultade e niso chegamos a acordos, pero quedan por tratar cuestións fundamentais como a xornada e o salario”. Melón engadiu que “a folga o mércores continúa coa mesma intensidade, porque en todo caso de chegar a un acordo sempre se traería a esta asemblea para que fora sometido a votación polo conxunto dos traballadores aquí presentes”. Melón advertiu que “non se poden frustrar as demandas dos traballadores, e se desde a patronal non se quere máis conflitividade deben decatarse de cal é a vontade do persoal que está a apoiar con firmeza e forza esta convocatoria de folga”.

A manifestación, que veu precedida e acompañada por un forte dispositivo policial, percorreu as rúas de Policarpo Sanz e García Barbón até chegar ao nó de Isaac Peral. Alí concentráronse os traballadores, que decidiron desconvocar esta marcha e comezar para o mércores “a concentración ás once da mañá, para tomar outro tipo de medidas se son necesarias e as negociacións non avanzan”.

Desde Isaac Peral os traballadores fixeron a marcha en sentido inverso, baixo a presión de máis de oito furgóns policiais, que seguiron aos folguistas até a Praza de España, onde detiveron a catro traballadores, que foron levados á comisaria e acusados de alteración da orde pública. Despois de prestar declaración foron postos en liberdade.

Este mércores, a partir das 16:30 horas, ambas as partes retoman as negociacións no edificio administrativo da Xunta en Vigo.

Haberá unha nova xornada de folga este mércores, e o paro será indefinido a partir do día 16, en caso de que non haxa un acordo definitivo.

ADEUS DE STOICHKOV

Trala bomba informativa que supuso no día de onte a marcha do Celta de Stoichkov, están saíndo diferentes versións sobre as razóns da súa marcha. Mentres uns falan dun cese por parte da directiva, outros falan de que son motivos persoais os que fixeron que o propio búlgaro presentara a súa renuncia ó cargo. O caso é que HS xa non é adestrador do equipo, e agora será Lopez Caro quen chegue para ocuparse dese posto de adestrador. Iso é o verdadeiramente importante, e entrar agora en discusións sobre se marchou el ou se o botaron dende a directiva é un absurdo, e pouco beneficioso para o equipo. Stoichkov é dende hoxe historia pasada do Celta, e o único que debería preocuparnos dende xa é o encontro do vindeiro sábado fronte o Albacete. Agardemos que os xornalistas de turno non fagan deste caso un novo culebrón.

FOLGA NA CONSTRUCCIÓN

O sector da construcción de toda a provincia de Pontevedra comezou esta pasada semana unha folga trala lentitude coa que a Patronal estivo amosándose na negociación de convenios moi importantes dentro deste sector. Agora mesmo as posturas de Patronal e sindicatos atópanse bastante alonxadas, o que fai que o conflicto non teña pinta de arreglarse axiña. Tal como fixemos no seu día coa folga levada a cabo polo sector Naval, e ante a grande incidencia que este sector tamén ten na nosa cidade, non queremos darlle as costas, e polo tanto faremos como daquela, traendo á nosa páxina a crónica que cada día fai a CIG na súa páxina web. Comezamos coa crónica que colgaron o pasado venres 5 de outubro, trala terceira xornada de folga.

Remata a primeira quenda de xornadas de folga da Construción nesta primeira semana de outubro cunha avaliación “moi satisfactoria”, e que posibilita afrontar as futuríbeis negociacións coa patronal con grande forza e unidade. O máis destacábel deste último día foi o grande aumento de participación na manifestación polo centro de Vigo.

No terceiro día de folga, e ante o masivo seguimento do paro na Construción, este xoves continuaban os piquetes para informar do desenvolvemento da folga, e tiñan lugar novas concentracións dos traballadores da Construción, así como a manifestación que percorría as principais rúas do centro de Vigo.

Dóbrase a participación

O máis salientábel desta xornada foi o aumento da participación na mobilización e concentración de traballadores desde a Porta do Sol en Vigo, que mesmo dobrou o número de persoas que se mobilizaron nas dúas anteriores xornadas.

Así, desde as doce da mañá comezaban a darse cita traballadores que chegaban desde os distintos piquetes e zonas da comarca, nos que se daba unha alta presenza de mocidade do sector, que se uniu a esta convocatoria masivamente.

Ás doce e media comezaban a percorrer o mesmo traxecto que na xornada anterior, desde Policarpo Sanz parando no cruce de Colón, continuando por Urzaiz, a Gran Vía, até chegar á Praza de España, na que tivo lugar a asemblea final.

Avaliación moi positiva

Xosé Xoán Melón, secretario nacional da CIG Construción, reflexionaba así nesta asemblea sobre esta “primeira etapa da folga, que se o deseñáramos milimetricamente non teriamos mellores resultados, porque a xente se foi animando progresivamente, xornada a xornada, nun sector como este que se levaba moitos anos sen mobilizar”.

Melón engadía que nesta convocatoria de folga “conseguimos transmitir o sentir do conxunto dos traballadores da Construción, porque a xente estaba farta de ver frustrada as súas expectativas, e de sufrir unha continua perda de poder adquisitivo”.

O secretario nacional da Construción da CIG avaliaba tamén esta primeira etapa como “moi satisfactoria, xa que o que queriamos conseguir está conseguido porque enviamos unha mensaxe moi clara á patronal de forza, e teñen que aceitar que esta folga non é ningunha loucura de ningún sindicato en particular, senón a vontade colectiva dos traballadores da Construción”.

Conflito que vai ser duro e longo

Melón adiantaba que “estamos ante un conflito que vai ser duro e longo, pero no que temos todo que gañar e nada que perder”; e nese sentido, sobre a posíbel mediación da Consellaría de Traballo para volver ás negociacións afirmou que “se nos chama Traballo, sentarémonos a negociar, pero sen presas nin urxencias, porque o martes continuaremos coa folga e as mobilizacións, aínda que teñamos as negociacións en paralelo”.

Quedaba con esta asemblea final pechada a primeira quenda de mobilizacións e folga polo Convenio provincial da Construción de Pontevedra até o martes 10 de outubro e mércores 11, no que se retomará a folga.

CELTA 3-XEREZ 1

O mellor encontro do Celta nesta tempada (sobre todo na segunda metade) rematou cunha merecida vitoria sobre o cadro andaluz; iso sí, o triunfo, que non se acadou ata os derradeiros dez minutos do partido, houbo que traballalo moitísimo, e foi nese derradeiro tramo de encontro cando os siareiros congregados en Balaídos poideron disfrutar cun equipo que con anterioridade tamén gozou de ocasións suficientes para aumenta-la ventaxe, mesmo cun gol mal anulado a Diego Costa cando o marcador reflexaba empate a uns. Canobbio, Diego Costa e Mario Suárez foron os goleadores da tarde por parte do Celta.

A animación pola nosa parte non foi mala, e inda que faltou bastante xente de novo por mor do horario do encontro, os que sí estiveron presentes animaron a un bo nivel, facendo que Balaídos semelle máis un campo de fútbol que un ceminterio.

Dende Celtarras censuramos uns feos detalles de Diego Costa sobre o equipo rival, tentando vacilar a un defensor cando o encontro, prácticamente xa rematado, xa estaba co 3-1, e que propiciou unha forte tangana entre xogadores dos dous equipos e mesmo a súa propia expulsión. Minutos despois do remate do encontro, o propio xogador brasileiro amosabase arrepentido e mesmo pedía disculpas, o que dende esta páxina tamén queremos salientar e aplaudir. Agardemos que non se repita máis.

No apartado anecdótico, sinalar que Perera, non sabemos por qué, durante este encontro convertíuse en Perea, ou polo menos así constaba no nome que poñía na súa camisola, no que consideramos un erro bastante grave. Ademais, no gol de Canobbio, no videomarcador anunciaron a Javi Guerrero, anterior dono do número 10 que agora luce o uruguaio, como autor déste, e que propiciou que dende Fondo tamén nos lembráramos de Gudelj, outro grande xogador celeste que lucíu ese número. Será por números 10...

Co partido xa resolto, dende Celtarras sacouse unha faixa de BATASUNA AURRERA, loxicamente en referencia ós acontecementos acaecidos esta semana en Euskal Herria, e pola cal 23 dirixentes abertzales foron enviados a prisión pola cara, nun atentado contra a democracia da que tanto presume o estado español. Dende Celtarras quixemos amosar dese modo a nosa solidariedade coa esquerda abertzale. A faixa foi exhibida sen problema algún, e sen que elo conlevara ningunha reacción hostil por parte da policía ou dos garadas de seguridade, que desta volta, e despois dos incidentes do encontro anterior, semellaron estar moito máis tranquilos e ó seu.

A quen non lles sentou moi ben a nosa faixa, foi ós catro frikis de turno do foro delcelta.com, que amparados na impunidade e mailo anonimato que da internet, voltaron a proferir insultos contra a nosa claque, algo ó que xa estamos acostumados. Se así son felices e se sinten máis realizados, pois por nós que non se corten e que segan piando o que lles pete, non vaia ser que collan un trauma por mor de Celtarras.

XA ESTÁN OS CARNETS

Dende hoxe mesmo xa teremos disponibles os carnets de Celtarras 07/08, e que se darán no mesmo intre no que cada persoa se faga socia da peña. Os que xa se fixeron socios no encontro anterior, tamén poderán recolle-lo seu carnet hoxe mesmo.

MATERIAL

O material de Celtarras que todavía queda disponible, e que mañá mesmo podes mercar no fútbol, é a gorra bordada a 12 euros, o chubasqueiro (a piques de esgotarse) a 20 euros, camisolas (os dous modelos que se sacaron con motivo da festa-aniversario de agosto) a 10 euros, a suadeira bordada tipo ninja (únicamente queda talla XXL. Abstenerse de pedir outras tallas porque non quedan) a 20 euros, bandeira galega co nome do grupo serigrafiado a 12 euros, chisqueiros a 1 euro e fotomontaxes a 1 euro.

Todavía estamos a recuperarnos do grande desembolso económico que supuso a festa do XX Aniversario, pero agardamos poder sacar novo material en breve. Ademais dos polos bordados exclusivos para soci@s que tentaremos facer para despois do inverno, a xente que leva o tema de material ten en mente sacar unha nova suadeira. A novidade sería que desta volta, en vez de seren bordadas, faríanse en vinilo.

Por outra banda, quen queira adquirir material por correo e contra-reembolso, que se dirixa a material_celtarras@yahoo.es

AXUDA CO MATERIAL

Seguindo co tema do material, a xente que se encarga máis deste tema precisa da axuda dunha ou dúas persoas máis que lles podan botar unha man, tanto na venda como noutras tarefas relacionadas con éste. A quen lle poida interesar, que fale cos que teñen o material. O único requisito que se pide é ser socio da peña e ser serio.

PREZOS REBAIXADOS

Tralos altos prezos das entradas nas primeiras xornadas do presente campionato, o Celta rebaixou nun corenta por cento as entradas para o encontro de mañá a partires das 18:30 horas. Inda que pagar 12 euros (8 para categoría xuvenil) para unha bancada como Fondo, e nunha categoría como a segunda, non é demasiado barato, polo menos non hai que desembolsar 20 euros como nos partidos anteriores, prezo que sí considerabamos bastante disparatado tendo en conta o que diciamos anteriormente; dende eiquí aplaudimos esa rebaixa, inda que cicais poderían retocar un pouco máis ese prezo. Dende o clube deberían darse conta que para as bancadas máis populares teñen que establecer prezos populares.

Iso sí, independentemente do que estamos a sinalar nestas liñas, tamén instamos a tódolos nosos membros a facerse socios da bancada de Fondo, que os carnets sí que son realmente económicos, e dese modo evitarse pasar por taquilla cada encontro, e mesmo poder aforrarse cartos.

FAITE SOCI@

¿Inda non te fixeches soci@ da peña?. Pois non deixes pasar máis tempo e faite mañá mesmo, antes do encontro Celta-Xerez na zona do Luar ou durante o descanso na bancada de Fondo.

Lembra que esta tempada tamén podes facerte soci@ durante o resto da semana na cervexería Piratas do Faro, na rúa Falperra.

E non esquezas que únicamente son 10 euros por tempada!!!.

CELTIC-MILAN

Este encontro da Champions League disputado o pasado mércores deixounos a grata nova da vitoria do equipo céltico por 2-1. Pero o máis salientable estivo na celebración do gol que daba o triunfo ós de Glasgow cando o encontro tocaba ó seu fin. Un siareiro local saltou ó campo e tocou ó porteiro brasileiro do Milan, Dida, que tras tentar irse a polo mozo en cuestión (que segundo parece xa foi sancionado cunha prohibición de por vida para entrar no Celtic Park) deixounos un espectáculo lamentable lanzándose ó chan e finxindo unha agresión que nunca existíu. O papel de cómico non rematou aí para Dida, xa que mesmo foi retirado en padiola e substituido polo porteiro suplente. Posteriormente saíu do estadio sen lesión algunha e sen mostras evidentes de ter recibido unha agresión.

Agardemos que ese feito non traia consecuencias deportivas negativas para os nosos irmáns do Celtic. Independentemente do que cada un opine ou deixe de opinar sobre o espontáneo en cuestión, quen merece un serio correctivo é o porteiro milanista, quen demostrou ser moi pouco profesional.

¿QUE PASA COA DEFENSA?

A solidez dun equipo comeza pola defensa, e un bo traballo defensivo é vital para acadar un resultado positivo, sobre todo cando falamos dun equipo económicamente modesto como é o noso. De feito, os éxitos máis recentes do noso equipo estiveron baseados precisamente no bo facer da defensa. O Celta que se clasificou para a Champions e a derradeira UEFA tiveron a Cavallero e Pinto, respectivamente, como trofeos Zamora do campionato ligueiro. No derradeiro ascenso, o papel da defensa xogou cicais un papel máis determinante que o dos atacantes, e mesmo o grande Celta dos Karpin, Mostovoi e compaña non terían conquerido grandes logros de non ter por detrás ós Michel, Cáceres, Djorovic, Berges e compaña.

O vivido o domingo pasado na cancha do Elxe foi tremendo. O dominio abrumador co que comezou o Celta o partido foise ó traste despois dun erro garrafal en defensa, tal como acontecera en ocasións precedentes. O plantel sabe que a resposta da actual defensa céltica é bastante pésima, e o equipo semella resentirse e xogar atenazado. Mesmo Pinto acusa os nervios propios dun porteiro que se sinte pouco arroupado por unha defensa insegura. O santiagués Rubén, e sobre todo Peña, son un auténtico colador, mentres que polas bandas pode entrar calquera sen apenas oposición. Neste senso, tamén hai que salientar que tanto Vara como Agus, os xogadores que últimamente teñen xogado máis minutos nos laterais, non son precisamente xogadores para ocupar esas demarcacións. Tras varios partidos ausente, George Lucas ten que colle-lo ton físico, e de Zanev descoñecemo-lo motivo da súa ausencia no equipo titular. En todo caso, se non poden xogar os laterais titulares e non hai recambios naturais, máis lóxico sería xogar con tres centrais prescindindo dos laterais, ou tirar de filial para ocupar esas demarcacións.

O caso máis complexo e polo cal escribimos estas lñas é o do centro da defensa. ¿Que fan Lequi e Contreras continuamente fóra das convocatorias cando a defensa pide trocos a berros?. A pasada tempada fumos moi críticos con Lequi e Contreras, e de feito houbo membros da nosa peña que tiveron fortes enfrontamentos co primeiro. Aplaudimos a tentativa da directiva de querer prescindir dos servizos dun e doutro durante o pasado verán, pero o caso é que non chegaron ofertas importantes, e agora un e outro son xogadores do Celta, que están a adestrar normalmente co resto do grupo e cobrando a súa pasta. O peor de todo é que todos sabemos que estando a un bo nivel, a parella Lequi-Contreras é moi superior a calquer outro central do equipo. Sabemos que o pasado ano estiveron mal, pero deberíaselles de da-la oportunidade para que eles mesmos demostren sobre o céspede cómo se atopan agora mesmo.

Eiquí tamén entrariamos no debate sobre a querencia destes xogadores pola bebida e as saídas nocturnas. O que se lle pide a un xogador é que estea ó 100% para afronta-los partidos. Se éste non cumple ó igual no campo que na discoteca, é normal que a xente lle faga rendir contas. Iso sí, se logo rinde como ten que rendir sobre o céspede, pois aí como se non durme; cada un que faga coa súa vida o que lle pete. O caso de Lequi é todavía máis peculiar, pois non esquezamos que foi o autor do segundo gol ante o Xetafe na derradeira xornada da liga pasada, e que se non fora polo tongo do Sardinero ben poidera ternos librado do descenso. Unha pregunta ó respecto; se o Betis non gañara en Santander, ¿estaría agora mesmo afastado na bancada ou tería un oco no once titular?. En fín, grandezas e miserias do fútbol.

Ogallá Stoichkov retifique e conte con estes dous xogadores que poden ser bastante válidos nesta nova andaina pola segunda división; bueno, ou iso ou que espabilen os actuais titulares.

Iso sí, independentemente de quen xogue, ante todo está o Celta, e nós imos animar ó Celta, por enriba do adestrador ou dos xogadores que estean no campo, no banco ou na bancada.